Ways of Life

Wiln̓aat’ahl G̱anhl Huwilphl Pdeeḵ

Wil limḵshl Nisg̱a’a ts’im lip algax̱diit g̱anhl lip wilaa loodiit, tx̱alpx̱hl g̱abiihl pdeeḵ wil bisbasaḵ’antkwhl Nisg̱a’ahl hli gadihl ḵ’alii aks. N̓ihl Lax̱sgiik, Lax̱gibuu, Gisḵ’aast ii G̱anada.

Wi’ii sgathl k’yoolhl Nisg̱a’a, ii jidaa gibuuhl nox̱t, wilk’ii n̓ihl pdeeḵhl hlgutk’ihlkw. Ḵ̱’ap adigwil n̓ihl yox̱gwihl Nisg̱a’ahl anuu nox̱t ahl dim pdeeḵhl hlgit.
Sim nidiit anooḵhl ayuuḵhl Nisg̱a’a dimt lip silg̱awilhl lip pdeeḵt. Ii huxwdii liksgathl dii pdeeḵhl g̱anigwoothl k’ubatk’ihlkw.

Huxw bisbasax̱kwhl pdeeḵ ahl lip wilphl sim’oogit ahl lip hlixhligutkwst ahl anuu nox̱t. N̓ihl wilhl Lax̱gibuu ahl wilps Duuḵ’, hilthl hli luu-simgigadihl wilps Duuḵ’, ii hlag̱ats’uudiit ii luu-anyeediit. Sayt k’il̓ wil bakwdiit ahl anuu nox̱diit.

K’il̓hl wilt ii hilthl hli angigatkwhl simoo’git wilk’iit sayt ninda-doḵdiithl wilp iit basaḵ’andiit ahl gilp’ilhl wilp n̓ihl wildiit ts’im-Gitlax̱t’aamiks, n̓ihl Gitḵ’ansnaat g̱anhl Gitwiln̓aak’il̓.