Ways of Life

Wil Sit’aatkwshl Sii Didilshl Hlgutk’ihlgum Gat

Tx̱aa n̓itkwshl hli gadihl Nisg̱a’a, iit m̓isḵ’a hooxdiithl ayuug̱am-wil sityeekwshl hli g̱andidilshl k’uba ii’uxwt. Xbil̓ hl g̱abiihl x̱k’uuhlkwhl hlgu gat wilt sit’aama’am siwilaay̓indiit dim wilaa didilst.

Sim n̓iwil xbil̓hl g̱abiihl x̱k’uuhlkwhl hlgu gat wilk’iit sdilhl g̱anibipkwt dim wil aat diit g̱anhl dim siilin̓skwdiit ahl lax̱-anjoḵ-diit wil n̓iwildiit. Dimt wilaa gwinga’at diit wilaa siwineeksdiit ahl dim gipdiit tx̱as maadim. Iit huxw gwinga’atdiit dim wilaa gwiix japt, ahl dimt japdiithl dim wil luuwandiit ii wilp sihoon. Iit huxw gwinga’atdiit dim wilaa si’oohlkwt g̱anhl dimt wilaa w̓ahl dim wil simaay̓hl hanaaḵ’. Sim n̓iwilt jagwihl hlgu gathl sim ksg̱oog̱am yats’iskw oo ligii lip wilaa jabihl hoon, wilk’iit gin̓amt ahl wilksi bakwst ahl n̓idiit dimt an ksg̱oog̱am giphl sii wineex. Sa guun̓, ii ḵ’ay hiyukwhl wilhl hlag̱ats’uuhl gat.

Hliskwhl tx̱oox̱kwhl wil ksilakst wilk’iit x̱k’ayhldiithl hlgu gat. Dimt wilaa mahl diit loot wil as’ajikshl g̱ag̱ootdiit loot wil hlaat wilaaxhl dim wilaa aatt g̱anhl dim siilin̓skwt. Lip aguhl gin̓amdiit loot. Ligii laakwsim galḵ, dim wilaa sag̱abooḵt g̱anhl am’ugit dimt an sigamkt yukwhl dim siilin̓skwt, oo ligii yukwhl dim aatt.