Ways of Life

Wil Sit’aatkwshl Sii G̱andidilshl Hlgutk’ihlgum Hanaḵ’

Ts’im-tx̱aa n̓itkwshl hli luu-gadihl Nisg̱a’a ii sim n̓iwil ḵ’aylimḵsihl k’uba hanaaḵ’, ii k’uba ii’uxwt, wilk’ii sit’aama’ahl hli angigatkwdiit siwilaay̓indiit ahl dim wilaa wildiit. Sim n̓iwil hanaḵ’hl hlguuhlgum hanaḵ’am̓, wilk’ii sit’aama’am dip siwilaay̓int. Iit guus nits’iits’t oo ligii nixdaat iit dag̱aljoḵt. Sim gik’uuhl iit didaaw̓ihldiit wil nimdiit ga’adiithl gat.
N̓iwilt siwilaay̓ins nits’iits’t g̱ans nixdaat dim wilaa amaa nakst g̱anhl dim amaa nox̱t ahl dim hlgit.

Siwilaay̓indiit dim wilaa kukwt, ii dim siwineekst, dimt wilaa japhl g̱a’am’ugitdiit. Dim iit wilaaxhl aguhl dim wilaa wilt jidaa nakst. G̱anhl dimt wilaa silimḵshl hlgit. Nidiit anooḵdiit dimt giphl wil liksgigathl hoon g̱anhl yats’iskw, ii nidiit anooḵdiithl dim hukskwt wil sayt g̱oodahl gat.

Hlaa hliskwdiit iit luuyalt’indiit ahl lip nigwoott g̱ans nox̱t. Ii hasaḵdiit dimt tx̱as yox̱kwhl wilaat siwilaay̓indiit. Mahldiit loot wil hlaa hanaḵ’t, ii nidii sgihl dim his- hlgutk’ihlkwst.

Initiation of Women Graphic