Cliquer emblèmes de totem pour l'histoire de totem.
Pole of Duuḵ Figures 1 and 2 Figure 3 Figure 4 Figure 5 Figure 6 Figure 7 Figure 8Figure 8
Figure 1
Figure 2
Figure 3
Figure 4
Figure 5
Figure 6
Figure 7
Figure 8
Fig9
Fig10
Content

Hli adaawag̱ahl Adoḵs:

1, Hlguuhlkwhl Lik’in̓skw (saa-daaw̓ihl wil n̓ii-t’aat lax̱’uhl ansgiy̓s ts’iw̓inhl pts’aan)

Wan n̓idima’a hli adaawag̱ahl nox̱hl smax. Ḵ̱’am luu-dihitgwidima’ahl hlgutk’ihlkw luu-sgit ahl ts’im-ansgiy̓st.

2. Hlgu x̱biishl ansgiy̓st n̓ii-t’aat hli ts’iw̓inhl w̓ii n̓agum g̱an wat ahl ḵ’aat’im ts’im-lax̱ha.

Ḵ̱’am ansgihl hli dim sim’oogidim hlgutk’ihlkw ahl wilps Kw’ax̱suu. N̓ii-sgi lax̱-pts’aan tgun, N̓ihl hli dim sim’oogidit hlguk’ihlkw tgun. Ḵ̱’am g̱an amgootdiit x̱biishl n̓ii-sgit lax̱-pts’aan, nidii luu-sgihl n̓uw̓t loot.

3. W̓ii ansgiy̓s wil n̓ii-t’aahl gibuu.
(Huxwdii saa-daaw̓ihl ayukws tgun.)

Ansgihl k’yoolhl hli luu-sim’oogidihl wilps Kw’ax̱suuhl ansgiy̓s tgun. Ḵ̱’am g̱anga’askwhl x̱biis tgun, nidii ḵ’ap luu- sgihl n̓uw̓t loot. N̓ii-t’aahl gahlgum gibuu lax̱’uhl x̱biis. Luu-dihitgwit hlgu wilksihl gum gibuu.

4. Baahlgum Gat
(luu-wanhl ts’al̓a gat ahl hli ts’imuxwhl sim’oogidim gibuu)
5. Sim’oogidim Gibuu.
(Dax̱yukwdit gahlgum hayatskw)

Huxw tḵ’al-luu-dihitgwit ayukwsim hlgu Wilksihlgum Gibuu.

6. Lik’in̓sgum Uuḵ
(Gahlkwhl hayatskw tgun)

G̱ooḵhl dim bakwhl mismaaksgum gat, ii ksax̱ uuḵhl dii sgit ahl saḵ’ap-hli gadihl luu-ksgigeenixim lax-mo’on. Nidii dox̱hl t’uuts’kw loodiit. N̓ig̱an wilt ḵ’ay sag̱ag̱etkwdiit hayatsgum uuḵ. Hooxdiit wilt luu-sityeexwdiit ahl simgit agu. Hlaa n̓ii-t’aat lax̱-pts’aan, iit gwinga’adihl hli amaa wilhl Sim’oogit.

Wilt giikwdiithl Hayatskw:

Jidaa hasaḵhl sim’oogit ahl hayatsgum uuḵ, iit gwin̓at ahl gwiix jabit dimt japt loot. Wilk’ii gwildim g̱oot hli luu-gadihl wilp, dim x̱hlga’umdiit. Ligii gilp’ilhl k’uuhl gwildim g̱oodadiit. Sayt dox̱diithl dim hax̱hlg̱a’umdiit. Hlaa hliskwhl hayatskw, wilk’iit t’aadihl sim’oogithl w̓ii lil̓igit, huw̓o’ot gat andaaxhl g̱alts’ap. G̱anhl gat an japhl hayatskw, yukwhl dimt x̱hlg̱o’ohl sim’oogithl gwiix jabit.

Hlaa hliskw wilaa loodiit lax̱-anlil̓git. Wil k’iit sgidiit dim wil t’aahl gwiix jabit ahl silkwhl wilp, iit x̱hlg̱o’odiit.

Wilk’iit gwin hit’inhl sim’oogithl g̱an, k’il̓ di huxw ḵ’aaxhl g̱an̓agwihl g̱anhl hit’in diit.

Sim gik’uuhl iit yayt giikwdiit gwilam Hutsin Bay, 50 sens wilaa g̱etkwt gik’uuhl. Wilk’iit sit’aama’am n̓ii-dox̱diit ahl g̱an̓agwihl g̱an. Wil wayt m̓in-aḵhlkwt hli ts’iw̓int.

Wilk’iit gidax̱hl Sim’oogit ji ts’eexhl g̱oothl guxw jabit. G̱anii n̓i wilaa t’aat nidii x̱sdaltkwt, ts’im-ts’anksgwithl an’unt.

Wilk’ii hihl sim’oogit, sim huxw hit’inhl ts’uu gip’ilhl g̱an-is. Iit huxw n̓ii-dox̱diithl gwila loot wilt wayt w̓ahl hli ts’iw̓int. Wil k’iit huxw gidax̱hl sim’oogit ii nidii x̱sdaltkwhl guxw jabit.

Huxw hihl sim’oogit: “Sim hit’inhl ts’uu gwilal̓hl g̱an-is.” Iit huxw n̓ii-t’ahldiit gwila, ii gwaaskwdiit ahl sim’oogit ahl k’il̓hl wilp. Sayt doḵdiithl anaasa x̱adaa, hly̓oon g̱anhl wijix. Iit n̓ii-t’ahldiit lax̱- g̱an.

N̓i wilt huxw gidax̱hl sim’oogit ji ts’eexhl g̱oothl guxw jabit. G̱anii n̓i wilaa t’aat, nidii x̱sdaltkwt.

“Way, sim huxw hit’inhl ts’uu tx̱alpx̱at g̱an-is.” Hlaa dukwskwdiit ahl anhooya’a wilk’iit bax̱-doḵdiit mm̓aal, luu-gip’il wil k’apgwihl gwiilahl k’il̓hl m̓aal, ii luu- kwsdinsihl gwiila ahl k’il̓hl g̱al’inḵ.

Hlaa m̓in-aḵhlkwdiit ahl ts’iw̓inhl g̱an wil k’iit gidax̱hl sim’oogit jihlaa ts’eexhl g̱oothl guxw jabit.

N̓i wil g̱aks hitkwhl guxw jabit iit ksi- doḵhl an’unt ahl ts’im-ts’ankst ii g̱oḵt.

N̓i wil hihl Sim’oogit: “G̱al t’il̓thl ts’eexhl g̱oodin, haw̓indii ts’eexhl g̱oodiy̓ ahl g̱as g̱oo ni x̱hlg̱o’on.”

Hlaat guuhl sim’oogithl hayatskw wilk’iit gin̓amhl dim wat, iit japdiit dim hli limit. Tx̱aa n̓itkwshl hayatskw ii ḵ’ap sgihl hli limit, hooxdiithl limxhl nax̱noḵ.

7. Hli Gadihl Ala
(luu-wanhl hli ts’al̓hl k’uba smax ahl hli muxwhl nox̱hl smax) (Nidii wilaakshl adaawaḵ)

8. Nox̱hl Smax
9. Tx̱aa n̓itkws hli hlgihl lik’in̓skw.
(t’ipx̱aathl k’uba smax g̱alax̱’uhl t’img̱est. Ii t’ipx̱aathl k’uba smax ahl hli lax̱-ḵ’ehlḵhl nox̱hl smax).

N̓ihl g̱ag̱edim adaawaḵhl Lax̱gibuu. Ii tgun wilaa jabihl smax tgun, sg̱a-hats’dithl hoon ahl ts’imaaḵt.

Sim gik’uuhl hlaa mukwhl maay̓ tx̱as sint, ii adigwil sayt kw’ihl saa-hlo’ohl haanaḵ’ ahl g̱alts’ap, g̱o’odiit wil simaay̓diit ahl g̱agililihl g̱alts’ap n̓iwilt sdildiithl k’yoohl hlguuhlgum hanaḵ’hl sim’oogit. N̓it an luu-daltkwhl ax̱ anbiskw wil dii simaay̓t.

Sim hiihlukw wilt kwsdaḵsihl haanaḵ’hl g̱alts’ap, wilk’ii saa-hlo’odiit lax̱-dax g̱aḵ’alaan̓hl g̱alts’aphl dim g̱o’odiit wil t’ahl maay̓. Yukwhl hlo’odiit n̓iwil wilhl hanaḵ’ tgus, n̓ii-yatl’ikskwhl hli ksaxwhl smax. Sim siipkwhl g̱oothl hanaḵ’ tgus iit kwhlii-haks hlagadoo’ohl smax, lip agu wilaa hit ahl smax. Hliskwhl hit wilk’ii hlo’odiit, g̱o’odit wil t’ahl maay̓.

Luu-dabihl sahl wilhl haanaḵ’hl simaay̓diit. Hlaa mitmitkwhl g̱adihlkwdiit, wilk’iit gwildim g̱oot’indiithl g̱adihlkwdiit hlaa dim haw̓diit. N̓iwil wilhl hanaḵ’, gwildim g̱oot’inthl walxt ii gwanim t’ukwhlal̓st hli deex̱hl dii dihlkwt. Hagwin-hlo’o hlag̱a ts’uuhl haanaḵ’ dimt hlimoomdiit n̓it. G̱anii n̓ihl wilt, gwanim t’ukwhlal̓st. Hlaa pliihlikskwhl silg̱a wilithl gibe’eskw diit, n̓iwil hit loodiit, “Ado’o k’ii hlo’osim̓ dim sil̓idiy̓ n̓isim̓.”

Hlaa g̱alaanhl silsdilit, bayt ligii w̓itkwhl gat awa’at, ii n̓iwil hit ahl hanaḵ’, “Dim hlimoomiy̓ n̓iin, dim jabiy̓hl dihlgwin.” Ḵ’am ḵ’e’ent wilaagwihl gathl dihlkwt iit hlisa’ant. N̓iwil hihl gat loot, “Dim gwilks- sdiliy̓ n̓iin,” wilk’ii saa-hlo’odiit. Nidiit wilaaxhl hanaḵ’ wil liksgat wilaa hlo’odiit. Hlaat liksgat’int n̓iwil hihl gat loot: “Dim dag̱o’odiy̓ n̓iin awa’ahl wilp lax̱-sg̱an̓ist, dim ii k’ax luu-t’aan awa’ay̓.” Hlaa t’ip- yukwhl yukwsa ii nidiit da’aḵhlkwhl dim luuyaltkwt ahl wil joḵdiit, n̓iwil aḵhl wilt, aamhl k’ax̱ luu-t’aat awa’ahl gat.

Hlaa n̓akwhl yukwsa ii liksgat’inskwhl g̱alts’ap wil nidii w̓itkwt. Wilk’ii sit’aama’am gitksdiit loot. Hlaa huxw k’il̓hl sa iit w̓adiithl g̱ag̱eeḵst, ninda dox̱gwithl g̱ag̱eeḵshl smax. N̓iwilt wilaaxdiit wilt sidooḵhl smax n̓it.

Hlaa hugax̱hl g̱abiihl k’uuhl hlidaa kw’ootkwhl hanaḵ’ tgus iit wilaax kwsdinsoolhl g̱abiihl gimxditkwt wil ḵ’ay dididilst. Hlaa silkwhl maadim wilk’ii saa-yeehl silgidim gimxdit dim gigil̓thl sbi-smax lax̱-sg̱an̓ist wil luu-joḵdiit. Sim hiihlukw wil saa-yeet, hlaa hagwin-dilpkwt awa’ahl sbi-smax iit ga’ahl gimxdit wil aat’ikst, iit ninda dox̱ahl w̓ii smaxhl moosim an’unt, iit sg̱a-sawit ii hak’sim liks sgat wilaa yeet. Nidiit k’ax w̓ahl gimxdit.

Wilk’ii hak’sim luuyaltkwt ahl g̱alts’ap, wayt nidiit w̓ahl gigil̓diit. Hlaa huxw k’il̓hl sa, wilk’ii dii saa-yeehl luu-anyeehl wakt dim bag̱at dimt w̓ahl gimxdit. Hlaa hagwin-dilpkwt ahl awa’ahl sbi-smax wil luu- jok diit, n̓iwil hak’sim huxw wilhl w̓ii smax ninda dog̱athl gilp’ilhl g̱ats’iw̓in̓aḵst iit sg̱a-sawit. Ii huxwdii k’il̓a-yeehl gimxdit ii gwilks-g̱alw̓itkwt, nidii agu ji w̓ayit. N̓i wil huxwdii hihl ts’uu gwiloonhl niwagit dim huxw dii gigiks, wilk’ii saa-yeet sim hiihlukw, hlaa sim hagwin-dilpkwt awa’ahl sbi-smax n̓iwil huxw wilhl smax ninda dok dit gwilal̓thl g̱ats’iw̓in̓aḵst iit sg̱a-sawit ii huxwdii liksgat wilaa yeehl ts’uu gwiloonit niwagit, huxwdii g̱alw̓itkwt. N̓iwil huxw dii saa-yeehl ts’uu tx̱alpx̱doolhl niwagit ii g̱anii n̓it wilaagwihl smax n̓it, ninda didax̱ dog̱athl tx̱alpx̱ g̱ats’iw̓in̓aḵst iit, kw’ihl sawit ii huxwdii liksgat wilaa yeehl gat, ii huxwdii g̱al w̓itkwt. Yukwhl min-al’algaxhl niwagit mahldiit wilt aat’ixdiit wil sim hagwin-dilpkwdiit ahl sbi-smax ii nidiit wilaaxdiit ag̱ug̱ant ax̱ w̓adiit

N̓iwil huxwdii hihl ts’iw̓ingidim wakdiit, dim huxwdii saa-yeet, iit halaagax̱hl wakkwt. “Dim kw’oodikskw n̓iin, nidii hasag̱am̓hl dim saa-hlo’om̓hl dim giksim̓ loon”. Ansiguhl hlgu gat heediit, wilk’ii naahlḵt, sim luu-hugax̱at wilaa japkwhl naahlḵ. Hlaa gwildim g̱oodat wilk’iit jipjaphl amaa nax̱ iit doḵhl hugax̱hl g̱abiihl wineex dim aajax̱gwit ahl ligii gwilal̓hl sahl dim wilt.

Sim hiihlukw wilk’ii saa-yeet wil wayt yukwsahl g̱an̓agwihl yeet. Hlaa dim sḵ’eex̱kw wilk’ii joḵt hlaxwhl w̓ii seeḵs. Sim hiihlukw wilk’iit sit’aama’am pdaltkwhl sgan̓ist. Hlaat ga’ahl w̓ii smax wil aat’ikst, wilk’iit ninda x̱dog̱ahl g̱a kwsdins g̱ats’iw̓in̓aḵst iit baḵhl dimt k’il̓a sawit, nidiit aat’ix hlgu gat, g̱anii n̓i wilaa pdaltkwt lax̱-sg̱an̓ist awa’ahl sbi-smax.

Sim luu’aamhl g̱oothl hanaḵ’ wilt ga’ahl wil hlaa w̓ii gathl ts’iw̓ingidim gimxdit iit guuhl maakws iit dam̓ikst iit y̓ag̱a-uxt wil yeehl gimxdit. Ii wayt y̓ag̱a-ax̱lilpt awa’ahl wil yeet, iit guut ii aluut’aahl an’una gat ahl maakws. N̓iwilt wilaax wil ḵ’ay didilsihl gimxdit. Wilk’ii sit’aama’am pdaltkwt awa’ahl sbi-smax.

Hlaat wilaaxhl smax dim wilt jagwihl gat tgus n̓it, wilk’iit siwilaay̓int ahl lim’ooy̓. N̓ig̱an tx̱aa n̓itkwst jagwihl Nisg̱a’ahl smax iit yeetdiithl limx tgun lax̱’ut. Hlaa bax̱-aḵhlkwhl gimxdit ahl sbi-smax wil luu- joḵdiit, wilk’iit jagwihl w̓ii smax. Tx̱alpx̱doolhl hlgim smaxhl hanaḵ’ tgus. Gwiloonhl ii’uxwt ii k’yoolhl hanaḵ.’ N̓iwilt sayt doḵhl gimxdit n̓idiit iit luu- dihilyaltkwt ahl g̱alts’ap.

Hlaa ḵ’am sint, ii luu-g̱atg̱oot’inskw hli gadihl g̱alts’ap, sahoondiit, ii ginaa-luu- k’il̓ikskwhl k’uba smax ts’im-simwilp. Iit saa-doḵdiithl anaasa smaxdiit iit hug̱ax̱diit wilaa jipjabihl ḵ’ap k’ubatk’ihlkw, wilk’ii g̱alaaḵ’diit. N̓iwilt nax̱n̓as nox̱diit g̱a alimidihl k’ubatk’ihlkw. Adigwil t’aahl gimxdidiithl siix-ga’askwt ahl naahl dim aat’iksit, ḵ’am silkwthl w̓ayihl wildiit, saa-dog̱ahl gwiis smaxt. Sim n̓iwilt ga’ahl wil aat’iks nox̱diit, wilk’iit mahlit ahl gimxditkwt wil k’ii laam̓iit haxhooxdiithl g̱agwiis smaxdiit.

G̱anii n̓ihl wilaa liksgat’inskwhl nox̱diit, hlaa ḵ’am huxw sa, iit mahlit loodiit dim wil huxw saa-yeet. Hlaa wilt kwsdaḵsit, wil k’ii hit ahl k’uba smax, nii dim diit anooḵ diithl dim ts’akhl anlakw, dim adigwil n̓ii- t’ahldiithl lakw loot. N̓iwil wils nox̱diit ḵ’amts’in luuyaltkw ii liksgathl yox̱gwit yukwhl nii dim diit ga’ahl k’uba smax n̓it.

Sim n̓iwil g̱alaant wilk’iit saa-dog̱ahl k’uba ii’uxwim smax g̱agwiis smaxdiit wilk’ii g̱alaaḵ’diit, hlaat ga’as nox̱diit wilk’ii ts’ilim-bax̱t iit sayt dox̱hl g̱agwiis smaxdiit wil k’iit n̓ii-txeldit lax-anlakw. Wilk’ii wanhl k’ubatk’ihlkw sigatkwdiit. Hlaa ḵ’ap m̓isḵ’a k’ubatk’ihlkwdiit guun̓. Ḵ’am k’yoolhl hlgu hanaḵ’ an da’aḵhlkwt ginaa- haxhooxhl anaasa smax.

Hlaa aamhl g̱an̓agwit, hlaa w̓it’ax̱ ii’uxwthl k’ubatk’ihlkw, hlaa silkwhl maadim wilk’ii saa-hlo’odiit, siilin-smaxdiit. Sdildiithl gimxdim smaxdiit. N̓it an adigwil w̓ahl wil wanhl sbi-smax, wilk’iit jakwdiit, n̓ihl gip diit tx̱as maadim.

Content for id "nisgaatext9" Goes Here
Content for id "nisgaatext10" Goes Here
Content

Histoires des emblèmes :

1. Ourson grizzli (sculpture détachée sur une boîte funéraire au sommet du totem)

L’Ourson est vraisemblablement une référence à l’histoire de la Mère Ourse. Il pourrait aussi représenter l’enfant dont la boîte funéraire perpétue le souvenir.

2. Petite boîte funéraire surmontant une longue partie lisse du totem appelée Canne du Ciel

La boîte funéraire rappelle le souvenir de la mort d’un bébé Kw’ax̱suu qui serait un jour devenu chef. Les boîtes funéraires étaient symboliques et ne contenaient pas de restes humains.

3. Grande boîte funéraire avec Loup (sculpture détachée)

Cette boîte funéraire rappelle Hlabikskw, un chef important de la lignée de Kw’ax̱suu. Les boîtes funéraires étaient symboliques et ne contenaient pas de restes humains. La figure sculptée du Loup qui la surmonte représente le Prince des Loups.

4. Personne fendue
(visage entre les oreilles du Chef des Loups)

5. Chef des Loups
(tenant un bouclier sculpté)

Cet emblème pourrait aussi représenter le Prince des Loups

6. Cuivre de l’Ours grizzli
(bouclier sculpté)

Avant le contact avec les Européens, le cuivre était le seul métal dont disposaient les peuples de la côte Nord; ils lui accordaient donc une grande valeur. Les boucliers de cuivre étaient souvent utilisés comme biens d’échanges commerciaux, d’où la supposition que cet emblème puisse symboliser la richesse.

7. Gens du Trou à fumée
(visages sur les deux pattes de la Mère Ourse)

8. Mère Ourse

La Mère Ourse est une histoire importante de la tribu du Loup. On la voit ici avec un saumon dans la gueule.

9. Tous les enfants de l’Ourse grizzli
(deux petits ours au-dessus de la tête de la Mère Ourse et un ourson sur sa poitrine)

Ces oursons représentent une partie de l’histoire de la Mère Ourse.

Content for id "engtext9" Goes Here
Content for id "engtext10" Goes Here