Ayukws Haym̓aas

FROG WOMAN

Sim gik’uuhl ḵ’ayukwhl joḵhl Lax̱gibuum Gitgigeenix ahl g̱alts’abim Andigwaalee. Ii t’aahl amaa m̍asim hlguuhlgum hanaḵ’hl Sim’oogit N̓agwa’un N̓ii-gamkshl wat. Sim hilthl ii’uxwthl hasag̱at dimt an nakskwt, iit gwanim sg̱aaxws dip nigwoott g̱ans nibipt, ahl wil sim anhluut’ukwsim hanaḵ’ n̍it ahl wilphl Lax̱gibuum Gitgigeenix.

Wilaa loodiit gik’uuhl, g̱ooḵ dimt anooḵdiit dimt guuhl gathl hanaḵ’ iit luu- bax̱baḵdiithl ts’im-an’unt, jidaa luu-guxw gugwe’et iit wilaaxdiit wil gwiix-alayst ii gwiix-woḵt. Ii jidaa luu-sax̱seeḵ’alt iit wilaaxdiit wil gwiix-hahlal̓st ii gwiix- siwineext, n̍ihl aamit-g̱at tgus dimt an nakskwhl hlguuhlgum hanaḵ’t. Hlaa sim plakskwhl g̱oots N̓ii-gamks wilaa kw’ihl his dip nigwoott g̱ans nibipt sg̱aaxwdiit dimt an n̍aam nakskws n̍it n̓iwil hit as dip nigwoott g̱ans nibipt aamhl hlaa dim anooḵ’askwdiit.

K’il̓hl sa ii w̓itkwhl amaa jabim gat, w̓ii- ooks hligatt ii dax̱gatt, ii n̓ihl wilt sim luu- sax̱seeḵ’alhl ts’im-an’unt. N̓iwilt g̱aks anooḵhl sim’oogit N̓agwa’un, n̓ihl gat tgunhl tḵ’al-aamit dimt an nakskwhl hlguuhlgum hanaḵ’t. Iit anooḵhl Sim’oogit k’ax̱ silg̱awilhl gat tgus hlguuhlgum hanaḵ’t. Iit anooḵhl dimt saḵ’ap-diyeet.

K’il̓hl sa ii nidii luu-hilyaltkws dip N̓ii-gamks g̱anhl gat. Wilk’ii winwantkwhl g̱a g̱oots dip nigwoott, wilk’ii sit’aama’am gigitksdiit loot. N̓iwil g̱aks luu-wanhl g̱ag̱ootdiit nidiit wilaaxdiit wilaa w̓itkwhl gat tgus. Wilk’ii sit’aama’am gigiksdiit ii gigiksdiit g̱osdiit dimt w̓adit wil huwildiit. Wilk’ii bax̱-hlo’odiit awa’ahl w̓ii t’ax̱hl jabihl ts’imilx, g̱agililxhl g̱alts’ap. N̓iwilt w̓adiithl g̱ag̱eeḵst ii wayt lag̱am-sgit ts’im-w̓ii t’ax̱hl japhl ts’imilx. Wilaaxdiit wil sim mitkwt ahl wil liksgigathl g̱anaaw̓. K’il̓hl wilt iit huxw ga’adiit sim liks jabim g̱anaaw̓, g̱aḵ’aaxhl w̓ii g̱anaaw̓ tgus, siwat diit ahl gibaygum g̱anaaw̓.

Lip agu wilaa wilhl hli gadihl g̱alts’ap dimt wilaa w̓adiit N̓ii-gamks, hlaat giiskwhl luu- dabihl k’uuhl kw’ootkwt. G̱ax̱bi k’il̓hl wilt iit ga’ahl g̱asiilin̓sgwit wil gigabint lax̱-t’ax̱. N̓iwilt w̓o’ohl sim’oogithl ii’uxwt hli gadihl Gitwinksihlkw g̱anhl gat daaxhl g̱alts’ap. Dim m̓at’indiithl t’ax̱ dimt wilaa w̓adiit N̓ii-gamks. N̓iwil hasaḵs N̓agwa’un dimt ksax̱ gidii-guutdiithl gibaygum g̱anaaw̓ jidaat ga’adiit.

Hlaa sayt g̱ootdiit iit m̓aat’indiithl w̓ii andilg̱anhl ts’imilx wilk’ii ksi-bax̱hl hli luu- aksihl w̓ii t’ax̱. Yukwhl ksi-bax̱hl aks ii ksi- al’ulkskwhl wil liksgigathl g̱anaaw̓. G̱ooḵhl dim luu-g̱oodahl w̓ii t’ax̱ wilkii ksi-aat’ikshl w̓ii gibaygum g̱anaaw̓. Nax̱noḵ. Baḵdiit dimt ksax̱ gidii-guutdiit oo ligii dimt k’ilyatsdiit ii ksi-mootkwhl w̓ii gibaygum g̱anaaw̓.

N̓iwilt ga’adiit wil ginaa-gwalkws N̓ii-gamks lax̱-t’ax̱. Lip nda wil ksi-wanhl g̱anaaw̓ ahl hli gatt. Ksi-wanhl g̱anaaw̓ ahl ligil̓t ii ḵ’ehlt ii an’unt ii sisay̓t ii bant.

N̓iwilt guutdiit N̓ii-gamks ahl wilphl sim’oogit iit baḵdiit dimt dimootkwdiit ii nidiit da’aḵhlkwdiit dimootkwdiit ahl hasiipkw t an wilaagwit, ii n̓iwil n̓uw̓t. Wilaaxdiit wilt ḵ’ap yaamaḵhl nax̱nog̱am gibaygum g̱anaaw̓t N̓ii-gamks. N̓iwilt guuhl wilps N̓agwa’unt N̓ii-gamkshl dim ayukwsdiit loot. N̓ig̱an n̓ii-t’aahl hanaḵ’ wil ksi-wanhl g̱anaaw̓ ahl hli gatt ahl lax̱- pts’aans N̓agwa’un. Ii Lax̱-G̱anada an hooxhl gibaygum g̱anaaw̓.


WIYITGUM HANAḴ̓

Sim’oogit: Gitx̱’un
Pdeeḵ: Lax̱sgiik
Wiln̓aat’ahl: Lax̱luuks

Sim gik’uuhl, ii hasaḵhl hlguuhlgum gats Gitx̱’unhl dim sinlaaxwt, dim silsdilithl gwiloonhl ansipsiip’insgum ii’uxwt ahl g̱alts’ap. Lax̱ G̱anadahl hlguuhlgum gats Gitx̱’un ii w̓itkwt ahl wilps Haym̓aas. G̱anadat nox̱hl hlgu gat. Ḵ̱’ay yukwhl kw’oot’ishl g̱ag̱oothl hli gadihl g̱alts’ap wil kw’ootkwhl gwislisim hanaḵ’s Gitx̱’un, wat as Ḵ̱’alaḵ’un. Yaamag̱ahl nax̱nog̱am G̱anaaw̓ n̓it. Iit dikw’ootkwt w̓itkw ahl g̱alts’ap.

G̱ooḵhl dim ukws-heetkwhl k’uba ii’uxwt, iit saa-gwin̓adihl hlguuhlgum gats Gitx̱’unhl g̱aydim nax̱naax̱t. Nidiit anooḵs Gitx̱’un ahl wil lip ayukwsdiit loot. Ḵ̱’ap ayuuḵ nimdii anooḵs dimt hooxhl liks pdeeḵhl ayukwshl sim’oogit, wil Lax̱sgiikhl wilit loot. Lax̱ G̱anada hlgu gat, nidii laa-hitkwhl hlgu gat ḵ’ap hasaḵt dimt hooxhl g̱ayts nigwoott. Ii lip agu wilaa wilhl hlgu gat, g̱ax̱bi wiyitkw, yukwhl wilt di anoog̱as Gitx̱’un wil dimt hooxhl gayt. Luu-aamhl g̱oothl hlgu gat wilt da’aḵhlkwhl g̱ayt. Wilk’iit y̓ag̱a-guutdiit m̓aal, wilk’ii sit’aama’am waaxdiit, n̓akwhl dim g̱o’odiit. Hlaat w̓adiit wil gisi-bax̱hl hlgu aks wil misihl laaxw, wilk’ii sit’aama’am y̓uxwdiit. Nidii aam wilaa wilhl hlgu gat loot. Tx̱aa n̓itkws dimt hats’ihl laaxwhl dii n̓ax̱t, ii gwanim saa-t’igwantkwhl g̱aydim nax̱naax̱t, ii huxw huuthl laaxw. Ii wilt w̓ii sa, gwanim saa-t’igwantkwhl g̱aytt. Sim siipkwhl g̱oott, iit n̓ii-ḵ’an yajax̱hl g̱aytt lax̱-aks iit haks hli g̱adoo’os ḵ’alaḵ’un hli kw’ootgwit.

Hlaa k’aa daaw̓ihl sa, wilk’ii silakwshl k’uba ii’uxwt. Luu-gapdiithl ts’eets’iks iit luu-dox̱diithl lo’op loot, iit n̓ii-simihldiit. Hlaa limlamkhl lo’op, wilk’iit n̓ii-dox̱diithl aksim bilaḵ ii hiinaḵ, wilk’iit luu-dox̱diithl hoon loot. Iit huxw n̓ii-hap diit ahl hiinaḵ g̱anhl aksim bilaḵ, ii n̓ii- hapdiit ahl ts’eets’iks. (Siwatkw tgus ahl saal̓ip) Hlaa hugax̱ wilaa ankwst, iit saa-doḵdiit hli habit. Hlaa dim tx̱oox̱kwdiit iit huxw g̱o’odiithl hiinaḵ, n̓ihl hooxdiit ahl wo’osdiit. Iit amaa n̓ii-dox̱diithl ankwsim hoon loot hlaa dim tx̱oox̱kwdiit. N̓iwil w̓itkwhl hlgu g̱anaaw̓ iit n̓ii-g̱oskwhl hoonhl dim gipdiit. Sim siipkwhl goothl hlguuhlgum gats Gitx̱’un iit guuhl hlgu g̱anaaw̓ iit n̓ii-uxt lax̱-anlakw.

Hlaa yukwhl dim huxw sit’aama’am tx̱oox̱kwdiit iit huxw n̓ii-g̱oskwhl k’eegwihl hlgu g̱anaaw̓hl dim gipdiit. Tḵ’al-yeehl siipkwhl g̱oothl hlguuhlgum gats Gitx̱’un, iit huxw n̓ii-uxt lax̱-anlakw. Hlaa sim yukwhl dim huxw tx̱oox̱kwdiit, n̓iwilt huxw n̓ii-g̱oskwhl ts’uu gwilal̓thl g̱anaaw̓hl dim gipdiit. N̓iwilt huxw n̓ii-ux hlgu gat lax̱-anlakw.

Gwinaadiihl hlaa dii aat’ikshl w̓ii g̱anaaw̓, iit huxwdiit n̓ii-g̱oskwhl hoonhl dim gip diit. Tḵ’al-yeehl siipkwhl g̱oothl hlgu gat, iit gidii-guuhl w̓ii g̱anaaw̓ iit tx̱aa n̓ii- mag̱at lax̱-anlakw. Bag̱ahl silg̱a-wilit dimt leel̓tdiit n̓it. Nidii aamhl dim wilim̓, dim x̱hootgwit n̓uum̓, nidii n̓aam amukwst loodiit.

Guudithl w̓ii g̱anaaw̓ iit n̓ii-uxt lax̱-anlakw iit guuhl g̱an iit ṉii-dax̱yugwit wil wayt kwhlii-dalbikskwhl w̓ii g̱anaaw̓ ii n̓uw̓t.

Sim n̓iwil n̓uw̓hl w̓ii g̱anaaw̓ iit nax̱n̓adiit wil wiyitkwhl han̓aḵ’ sbayt-g̱ang̱an gililx. Diwiyitgwihl hanaḵ’hl hit: “Agu mag̱an sim simihl didilsit. Hlgiy̓hl k’uba g̱anaaw̓ ii naksiy̓ ahl w̓ii g̱anaaw̓. Luu-am’aamhl g̱ag̱ootdiit dimt ts’ilayxwdiit n̓iin wil w̓itgwin.”Diwiyitgwihl han̓aḵ’hl hit.

Lax̱biits’iixwhl k’uba ii’uxwt ii hidiithl dim huutdiit. Wilk’ii y̓ag̱a-g̱oldiit ts’im- m̓aal iit ukws-guxwdiit, ii sit’aama’am waaxdiit.

Yox̱gwihl hanaḵ’hl g̱alaandiit lax̱-ts’eehl aks, diwiyitgwithl hit. “Agu mag̱an sim simihl naksiy̓, agu mag̱an simihl hlgiy̓? Yukwhl luu-am’aamhl g̱ag̱ootdiit wilt ga’adiit n̓iin.” Hooyithl w̓ii sitl’aḵ’kwt iit dax̱yugwihl ḵ’aat’, n̓ii-t’aahl w̓ii g̱anaaw̓ ahl hli ts’iw̓int.

Sim luug̱atg̱oot’inskwhl k’uba ii’uxwthl waaxdiit. N̓iwilt x̱hootkwhl hanaḵ’ n̓idiit yukwt diwiyitkwhl hit. “Dim luu- gik’yoolim daxw n̓isim̓ gwilks-yukwsim̓ ahl wil joḵsim̓, txaa n̓itkws mi wil sim giiskwhl ts’iw̓inḵhl. Hlaat k’il̓a giiskwdiithl ts’iw̓inḵhl, ii hlguuhlgum gats Gitx̱’unhl ksg̱oog̱am hasbaa-hlo’ot ts’im- m̓aal. Wilk’ii luu-g̱atg̱oot’inskwhl k’uba ii’uxwthl waaxdiit. Ii n̓ihl wil saa-gik’yooldiit, luu-hugax̱hl hihl hanaḵ’ an yox̱kwdiit.

Ii ḵ’am k’yoohl hlgu gathl ginaa-didilsit, iit nax̱n̓ahl wil hihl hanaḵ’ loot dim huxw dii n̓uw̓ n̓iin hliskw mi dim mahlihl ag̱ug̱an wilsim̓.

Hlaa hagwin-dilpkwt ahl g̱alts’ap ii ayaawaatkwt ii wiyitkwt, iit wilaax hli gadihl g̱alts’aphl liksgathl wildiit. Iit y̓ag̱a- doḵdiit mm̓aal iit luu-daltkwdiit. Hlaa hagwin-lakdiit awa’ahl m̓aalhl k’uba ii’uxwt, iit gidax̱diit ndahl wildiit.

N̓iwil hit: “Nindii da’aḵhlkw ni dim mahlit loosim̓, ḵ’ap dim bax̱-guudisim̓ n̓iiy̓ ahl wilphl sim’oogit n̓i dim wil g̱aks adawaag̱ahl ndahl y̓ay ḵ’ap wilim̓.”

N̓ihl wildiit, nuut’indiit n̓it iit diyeediit ahl wilphl sim’oogit, iit amaa t’aatdiit ts’im- wilp. Hlaa k’ax̱ haw̓hl sigatkwhl gat, n̓i wilt sit’aama’am mahlihl ndahl y̓ay ḵ’ap wildiit. Iit sit’aama’am adawaag̱ahl wilt hakshl hlgu gathl g̱ayts nigwoott iit n̓ii- yajax̱t lax̱-aks, iit huxw n̓ii-tx̱eldihl k’uba g̱anaaw̓ g̱anhl w̓ii g̱anaaw̓ lax̱-anlakw. N̓i wilt nax̱n̓adiit wil wiyitkwhl hanaḵ’, iit x̱hootkwdiit. Sim n̓iwil hliskwhl adawaaḵt ii huxw dii hasbaa-hlo’ot.

Sim n̓iwil n̓uw̓t wilk’ii w̓itkwhl hanaḵ’ ahl g̱alts’ap yukwdithl w̓ii ḵ’aat n̓ii-t’aahl g̱anaaw̓ loot. N̓iwil hit, ndahl wilsim̓ g̱an mi ax̱ siwilaay̓inhl g̱ahlgisim̓hl dim w̓ii x̱ooskwdiit. Sim n̓iwilt hit’inhl ḵ’aatt wil k’ii ksi-buxwhl lakw loot. Iit t’ip-mihlihl g̱alts’ap, tḵ’al-mihl hli gadihl g̱alts’ap.

Y̓askwhl k’yoolhl hlgu hanaḵ’ iit luu-dit’aas nits’iits’t ts’im-wilba y̓askw. Ksax̱ n̓idiithl limootgwit. Iit wilaaxhl wiyitgum hanaḵ’ wil luu-wandiit loot, iit adawaag̱ahl agug̱ant t’ip-mihlihl g̱alts’ap. Dimt wilaa wilaaxhl gat agug̱an diltkwt iit t’ip-mihlihl g̱alts’ap.

L’Ecran D’Haym̓aas

Femme Grenouille D’Andigwaalee

Il y a longtemps, le clan Gitgigeenix de la tribu du Loup vivait dans le village d’Andigwaalee. Le chef Nagwa’un avait une très belle fille nommée N̓ii-gamks. Bien des hommes voulaient l’épouser, mais Nagwa’un n’avait nullement l’intention de la marier au premier venu, parce qu’elle était une personne importante pour la famille.

À cette époque lointaine, la coutume voulait qu’on touche la main du prétendant avant de lui accorder celle de la fille. Si ses mains étaient lisses, c’est qu’il n’était pas un bon travailleur. Mais s’il avait les mains dures et rugueuses, il était bon travailleur et il ferait un bon mari qui subviendrait aux besoins de sa famille. N̓ii-gamks était lasse et frustrée de voir son père et son oncle refuser les prétendants. Ils en vinrent au point où elle leur demanda de prendre bientôt une décision.

Un jour, un bel homme aux larges épaules et solidement bâti, se présenta. Comme il avait les mains rugueuses, Nagwa’un décida qu’il ferait un bon mari pour sa fille. Il permit donc à l’homme et à N̓ii-gamks de se fréquenter et de faire des promenades ensemble.

À l’issue de l’une de ces promenades, les deux jeunes gens ne revinrent pas. Paniqués, Nagwa’un et sa famille entreprirent des recherches.. Ils s’avisèrent alors qu’ils ne savaient même pas d’où venait le jeune homme. Ils cherchèrent partout, mais ne purent les trouver. Ils découvrirent enfin les empreintes de pas de N̓ii-gamks; elles menaient directement à un immense étang derrière le village, qui avait été créé par un barrage de castors. Cet étang était peuplé de grenouilles de toutes sortes et à quelques reprises, ils y avaient vu une grenouille surnaturelle géante et ailée. Ils l’avaient nommée la Grenouille volante, ou nax̱noḵ.

Ils continuèrent à chercher N̓ii-gamks pendant plus d’un an; de temps à autre, ils l’apercevaient à la surface de l’étang. Ils invitèrent enfin des hommes de Gitwinksihlkw et d’autres villages à les aider. Ils décidèrent de détruire le grand barrage de castors et de drainer l’étang pour trouver N̓ii-gamks. Nagwa’un leur ordonna aussi de capturer la Grenouille volante lorsqu’ils la verraient.

Le groupe d’hommes détruisit le grand barrage et l’eau sortit à flots de l’étang. À mesure que l’eau s’écoulait, beaucoup de petites grenouilles s’en échappaient. Et juste avant que l’étang ne se vide complètement, la grosse Grenouille volante sortit de l’eau. Les hommes tentèrent de la capturer et de la frapper avec leurs bâtons, mais elle s’envola au loin.

Puis ils virent N̓ii-gamks émerger de l’étang drainé. Elle était couverte de petites grenouilles qui semblaient sortir de son corps. Elle en avait sur les paupières, la poitrine, les bras, les jambes et le ventre.

Les hommes ramenèrent N̓ii-gamks chez elle et tentèrent de la guérir de cette étrange maladie; toutefois, ils n’y parvinrent pas et elle mourut. Ils comprirent que N̓ii-gamks avait été manipulée par nax̱noḵ, la Grenouille volante; la lignée de Nagwa’un adopta donc l’emblème d’une femme couverte de grenouilles et celui-ci est représenté sur le totem de Nagwa’un. Cependant la Grenouille volante est un emblème du clan du Corbeau, le G̱anadas.

Photographies historiques de L'Ecran D'Haym̓aas dans Ank'idaa
(cliquer pour agrandir)

Haymaas Screen Thumbnail imageHaymaas Screen Thumbnail imageHaymaas Screen Thumbnail image