Ways of Life

Sii K’uuhl Nisg̱a’a: Hoobiyee

N̓iwil sit’aathl luu’uksa’anhl Nisg̱a’ahl sii k’uuhl. Hlaa y̓aḵhl hloḵsim hoobiyee ii luu-am’aamhl g̱ag̱oothl Nisg̱a’a hlaa wil gyuwil-aḵhlkwdiit ahl tx̱as-n̓agum maadim. Ii ksi-g̱oldiit ahl g̱ahuwilpdiit ii ayaaliwaatdiit “hoobixgwis hee.” Ii dii ayaaliwaadihl k’ubatk’ihlkw, “hoobiyee” dihiida, n̓ig̱ant siwatdiit ahl hoobiyee. N̓ihl amg̱oodis Sim’oogit Haym̓aas (Chester Moore) hooyit hlaat hit’indiithl pts’aan ahl Gitwinksihlkw hloḵsim X̱laaxw 1990. Yeet’indiithl w̓iit’isim luu’uksa’an tgun ahl mahli k’il̓hl g̱alts’ap wil joḵhl Nisg̱a’a tx̱aa n̓itkwshl k’uuhl ahl hloḵsim Buxwlaḵs.

Yayt n̓ihl lip wilaa loohl Nisg̱a’a tgun hlo’otdiit hlaa wil ksi-gwantkwhl hloḵs ahl sim gik’uuhl g̱ooḵhl dim t’amtkwhl agu. Sg̱a-lihlkdiit tgun ahl hloḵsim Buxwlaḵs. Laaḵ’aldiit wilaa jabihl hloḵs tgun hlaa ksi-gwantkwt. N̓it an mahlihl dim wilaa jabihl k’uuhl ligii dim w̓iihoont oo ligii dim luu-niit. Jidaa hasbaa-gyooms hoobixt iit wilaaxdiit dim wil luu-mitkwhl k’uuhl. Dim ts’axwhl hoon, saak g̱anhl tx̱aa-n̓itkws wil yeehl wineex ahl dim siwineexhl Nisg̱a’a.

N̓ig̱ant siwatdiit ahl Hoobiyee saa-w̓itkw ahl wilaa hidiit ahl “Hoobixgwis hee” antḵ’al-n̓it’inskwdiit ahl “Wil mitkwhl hoobix” N̓ihl hlaat ga’ahl g̱a’angigatkwhl Nisg̱a’a gik’uuhl wilaa jabihl hloḵs tgus wilk’ii ksi-g̱oldiit ahl g̱ahuwilpdiit ii luu am’aamhl g̱ag̱ootdiit m̓in-hloohla’atdiithl g̱a an’undiit ayaaliwaatdiit: “Hoobixgwis hee, Hoobixgwis hee.”

Hlaa wilt luu’uksa’anhl Nisg̱a’ahl Hoobiyee ii w̓iit’isim g̱anluu’amaa g̱oot loodiit hlaat t’aatdiithl lil̓git yukwhl wildiit. Wil liksgigathl wineexhl n̓ii-doot lax̱- han̓iitx̱oox̱kw. Digit, ḵ’almoos, ilx̱, simiy̓een̓sgum t’ibin, tx̱ux, simiy̓een̓sgum hoon, hlaḵ’askw, g̱abooḵ, x̱sw̓inḵ ii ts’aḵ’.

Tgun G̱ant Amg̱oos Chester Moorehl Hoobiyee
Hlaa ḵ’ool̓thl x̱k’uuhlkwt yukwhl ts’ilim- wilḵ’a’am lakwt ahl Han̓iiyeeḵ, saḵhl gwineex̱kw g̱ooḵhl yukwsa ahl hloḵsim Buxwlaḵs. N̓iwilt nax̱n̓ahl wil ayaawaatkwhl k’yootkst g̱aḵ’alaan̓hl wilpt andoo’o. Iit hak’sim g̱al̓ihl lakwhl dog̱at ii ts’ilim-bax̱t ts’im-wilp iit mahlit as nigwoot, “Liksgathl wilhl k’yootksiy̓ andoo’o, yukwhl luubayt ayaawaatkwt.” N̓iwil his nigwoott: “L̓a ksi-ga’asgwin g̱anluug̱oyp’ax̱, ga’a ji y̓aḵhl hloḵs.” N̓iwil ksi-ga’askwt ahl g̱anluug̱oyp’ax̱ iit mahlit wil y̓aḵhl hloḵsim ax̱kw, wihl g̱esii ii sim hasbaa-gyoot. N̓iwil his nigwoott, “ado’o ksi-bax̱an galḵ ii dii ayaawaatgwin, hoobiyee” miya’an, dim sidaltdinhl amin. Ii wilt, iit huxwdii nax̱n̓ahl wil ayaaliwaadihl hlag̱ats’uuhl gat ahl g̱alts’ap.
Yukwt diyeehl dim miilukwhl hli gadihl g̱alts’ap Gitwinksihlkw g̱ooḵhl dim hit’insim pts’aandiit ahl hloḵsim X̱laaxw 1990, ii hasaḵt dimt w̓ahl dim limim saa-ba’anskwdiit. Hlaa gwilks-yukwt w̓itkwt Terrace, tk’u-yukwt ahl g̱enim sig̱an ahl Sii t’ax̱ iit ga’ahl wil t’aahl sii hloḵsim ax̱kw. N̓iwilt amg̱oohl hloḵsim hoobiyee, ii n̓iwil luu-daaw̓ihl hlgu limx hoobiyee ahl t’img̱est. Wilk’ii yukwt yeedit wil wayt gwilks-aḵhlkwt ahl Gitwinksihlkw. N̓iwilt siwilaay̓int ahl g̱amiilugwit.

Tx̱aa n̓itkwshl Nisg̱a’ahl wilit ahl luu’uksa’antgum Hoobiyee. Dim hooxdiit lip nda wil joḵdiit.