Ways of Life

Siilin̓skw

Siilin̓skw g̱anhl jaayeehl ḵ’ap hooyihl Nisg̱a’ahl wil siwineeksdiit.
Haxwdakw g̱anhl hawil ii k’inhl hooksit ahl siil̓in̓sgum jakw’iskw, ii jaayeehl ḵ’ap hooxdiit.

Gilp’il wil yeehl jaayeehl hooksit, jap g̱anhl hukw’is. Jap an gidii-dax̱yugwihl wiit’ax̱ g̱an ii jidaa luu-kwhli-yeehl jakw’iskw iit gidii-yatshl jap ii n̓ii-t’igwantkwhl w̓ii g̱an loot wiy̓ n̓uw̓t. Smax wil ḵ’ap hooks gun. Lip g̱adipdii wil hookshl hukw’is, ligii g̱ax̱ g̱anhl sisuusim smax.

Gilp’il wil yeehl k’inhl hooyihl Nisg̱a’a t’aapkhl hooksit ahl wiit’ax̱ yats’iskw, wilthl smax. Hli sg̱alxhl matxhl hooksit wil japkwhl t’aapk’. Ts’uusgim k’in siwatkwsit ahl naats’ n̓ihl hooksit ahl hakwhl hoon.

M̓isḵ’a n̓ihl yats’iskwhl siilintgwit oo ligii jaayeehl hooksit, smax, wijix, muus, wan gibuu, gandihlii, nag̱ats’e, ts’imilx, naaḵ’eeda, hat’, w̓een, lisy̓een, g̱ax̱, g̱anhl matx. Yats’isgum ts’im-akshl huxw siilindiit, n̓ihl ilx̱ g̱anhl t’ibin.

Mooji m̓isḵ’a n̓ihl yats’iskwhl hooksit ahl wineex ii hli ts’ipt. Anaast g̱anhl hli laxt ii hookst ahl si’anhooya’a g̱anhl am’ugit. Hookshl anaas g̱anhl lax ahl gwila, t’ax̱kw, kslaw̓iskw, g̱anhl maḵs ii hookshl ts’ip ahl sik’in, haḵ’ohl hag̱aapx̱aanskw ii hoobix.

Hunting
Caption IMG2008-0666-0089-Dm.gif
Hunting
Caption pn644.gif
Hunting
Caption PN13100.gif
Hunting
Caption PN13101.gif
Hunting
Caption PN13183.gif