Ways of Life

Tx̱eemsim

Sim gik’uuhl ii sḵ’eex̱kw han̓iijoḵ, mooji ax̱ g̱oyp’ax̱hl ḵ’alii aksim Lisims. Nidii sim aluut’aahl g̱oyp’ax ii g̱ag̱etkw wilaa jabihl gandidils. N̓ihl adaawaḵhl g̱andidils Tx̱eemsim tgun, huxwdaak’inhl Sim’oogit Ts’im-Lax̱ha. Ndahl wilaat da’aḵhlkwhl m̓isaax lax̱-han̓iijoḵ.

NAKSHL SIM’OOGIT
T’aahl sim w̓ahlin-g̱alts’ap ahl ḵ’alii-aksim Lisims, wat ahl Gwinsḵ’eex̱kw. Tx̱alpx̱doolhl simgigathl jog̱at loot. N̓iwil wilhl nakshl k’yoolhl sim’oogit, ḵ’amts’in ansiip’inskwt ahl k’yoolhl gat. Bayt ligii nidii luu-aamhl g̱oothl hanaḵ’ tgus, ii naahlḵt. Lip nda wilaa wilhl g̱ahalayt ii nidiit da’aḵhlkwdiit dimt dimootkwdiit. G̱ooḵhl dim n̓uw̓t iit yayt gwin̓ahl dim sim luu-ookshl dim ansgiy̓st, haxwhukw’iltgum g̱anhl dim hooxdiit. Dim hugax̱at wilaa jabihl sim wilp, dim n̓ii-sgidit lax̱-w̓ii seeḵs. Gwats’ luu-bahl- diithl anaasa matx g̱anhl anaasa gwiikw loot. Iit amaa tḵ’al-luu-dox̱hl sy̓oonhl dim gwilat. Hlaa n̓uw̓t ii n̓ihl wildiit, lukw’il luu-g̱etkwhl g̱oothl sim’oogit ahl wilhl nakst.

K’il̓hl yukwhl saḵ’ap-hlo’ohl gwislishl sim’oogit g̱anhl nakst awa’ahl andoosim gat. Nax̱n̓adiit wil n̓aa-t’ist’iskwhl ansgiy̓st lax̱-w̓ii seeḵs. Tgunhl hihl gat: “Ts’int’iniy̓ luulaḵ’” K’ax̱ han̓iig̱ootdiit luulaḵ’hl heheet, ii nidiit hugax̱hl amihl luulaḵ’, hugax̱athl amihl ḵ’ap gat, iit wilaaxdiit wil gathl heheet.

Wilk’iit mahldiit ahl sim’oogit, n̓iwil hihl sim’oogit ahl gwisliskwt, dimt ahlda lihlkdiit. Dim ga’adiit aguhl heet awa’ahl wil sgihl nakst. Hlaa huxw ax̱kw ii ahldaa wandiit. Aamhl g̱an̓agwit wilk’ii w̓itkwhl gat sbayt-sḵ’eex̱kw g̱ots’ax̱athl hlgu g̱aneeḵs. Wilk’ii m̓in-pdaltkwt wil sgihl hanaḵ’ wihl maaksgwiihl hli gatt. Wilk’ii n̓aa-t’ist’isa’at: “Ts’int’iniy̓ luulaḵ’” Luu-aamhl g̱oothl hanaḵ’ wil w̓itkwhl ansiip’inskwt. G̱ooḵhl dim m̓isaax wilk’ii gwilks-t’ip-pdalkwhl gat, iit g̱olts’ax̱hl hlgu g̱aneeḵs ii daaw̓ihlt. Yox̱gwihl gwisliskwhl sim’oogithl g̱alaant, ii ts’ilim- daaw̓ihlt ahl k’il̓hl wilp ahl g̱alts’ap. Nidiit naa an wilaaxhl gat tgus.

DIM SUUGATDIITHL GAT
Ssg̱ootkwhl sim’oogit g̱anhl gwisliskwt dimt w̓adiit dimt wilaa suugatdiithl gat tgus. Wilk’ii hlo’ohl gwisliskwt awa’ahl wilp wil luu-t’aahl gat wil k‘iit seelixdiit ahl dim siilin̓skwdiit. Ii saxkwhl gat dimt sdildiit. Yukwhl wildiit ii sḵ’eemikskw diit. Wilk’ii joḵdiit, nidiit wilaaxhl gat tgus wilt suugatdiit n̓it.

Sim n̓iwil galaandiit wilk’ii gwildim goodahl sim’oogit dimt ts’ilayxwhl nakst. G̱o’othl ganeeḵshl hooyihl gat, ii bax̱-yeet wil sgihl ansgiy̓shl nakst. Wilk’ii hit, hugax̱at wilaa hihl gat: “Ts’int’iniy̓ luulaḵ’.” Wilk’iit ḵ’ag̱ahl ansgiy̓s ii ts’ilim-daaw̓ihlt.

Sim luusaanaahlgwihl sim’oogit wil ḵ’ay dididilshl nakst, ii k’ay didax̱gatt. N̓iwil k’ax̱ min-al’algax̱diit. Hasaḵhl sim’oogit dimt gwilks-n̓aa-guut ahl g̱alts’ap dim iit t’aadihl lil̓git. Dim hlo’otdit wil x̱daas n̓it ahl gandidaxw, wil hak’sim hux̱w didilst. Nidii n̓aam dilimx̱kwhl hanaḵ’, g̱osihl sim’oogit dimt wilaa luu-sa’anhidax̱t. G̱anii nidii n̓aam wilhl hanaḵ’, wilk’ii siipkwhl g̱oohl sim’oogit iit guuhl haḵ’ohlt iit jagwihl nakst, wilk’ii gwilks- luu-yaltkwt ahl wilpt. N̓iwil wilhl gwisliskwt lihlkdiit, dim ga’adiit dim wilaa wilhl gat jidaa huxw w̓itkwt.

Hlaa ḵ’am huxw ax̱kw, ii w̓itkwhl gat awa’ahl wil sgihl hanaḵ’ walithl g̱aneeḵst, ii n̓aa-t’ist’isa’at ii nigii huxw dilimx̱kwt. N̓i wilt ḵ’ag̱ahl gathl ansgiy̓st ii luu- n̓akwst, ii sim mitkwhl an’unt ahl ihlee’e. Sim ts’aa-gyukwskw ii t’igwantkwt lax̱-ts’eets’iks. Wilk’ii gwilks-n̓aa-bax̱t awa’ahl wilpt. Wilaa jabihl ayuuḵ gik’uuhl. Jidaa hlaa n̓uw̓hl nakshl gat oo ligii hanaḵ’, iit ḵ’otsdiit g̱ag̱esdiit iit woḵ’ diit ts’im-ts’eets’iks.

LIKSGADIM HLGUTK’IHLKW
Hlaa gwooyim ii bax̱-hlo’ohl k’ubatk’ihlkw awa’ahl wil n̓ii-sgihl ansgiy̓s lax̱-w̓ii seeḵs, ii sgeel̓ax̱kwdiit. Hooxdiithl haxwdakw g̱anhl hawil. K’yoolhl hlgu gat an adigwil sayt doḵhl g̱a hawildiit. Yukwhl wildiit ii ḵ’aḵhl hli habax̱hl x̱biist ii ksi-bax̱hl hlgu gat iit sayt doḵhl g̱ahawildiit iit dihuutt. Hlaat ga’ahl k’ubatk’ihlkw wilk’ii n̓aa-huutdiit, iit hlbiyuxwdiithl g̱a’angigatkwdiit ahl ga’adiit.

Huxw bax̱-luu-hilyaltkwhl k’uba ii’uxwt sdildiithl dax̱gigadim ii’uxwt, ii sit’aama’am sgeel̓ax̱kwdiit, n̓iwil huxw wilhl hlgu gat sayt dox̱athl hawil. Huxw k’il̓hl wilhl k’uba ii’uxwt ii gwildim g̱oodadiit dimt gidii-guutdiit, n̓iwilt da’aḵhlkwdiit, iit diyeediit awa’ahl wilphl sim’oogit. N̓iwilt siwatdiit ahl Hlguuhlkwhl Luulaḵ’. Huxw k’il̓t siwadihl hli gadihl g̱alts’ap hlgu gat tgun ahl Anm̓oog̱am Haat.

Wilk’iit guuhl sim’oogit dim hlguuhlgum gatt loot. Hugax̱hl g̱an̓agwit ii aay̓inhl hli g̱ets’ipt. Wilk’iit wilaaxhl algax̱ iit silg̱a-wilhl silg̱adipdiitgwit. Ii adaawaḵhl t’ist’isit loot dimt wilaa wilaax agu, g̱anhl dim wilx̱o’oskwt. K’il̓hl adaawaḵhl nigii t’agit. Wilt mahldiit wil t’aahl g̱alts’ap ts’im-lax̱ha n̓iwil t’aahl Sim’oogidim Lax̱- ha basax̱ḵw ahl han̓iijoḵ. N̓iwil ninda hisyats’a’ahl w̓ii sg̱an̓isim lakw. Leex̱-ḵ’aḵ ii huxw sg̱a-daaw̓ihlt.

LUU-HLOOHLA’ATKWDIITHL TS’UUTS’
Hlaa ḵ’aym̓as hlguuhlkwhl luulaḵ’, ii t’aahl ansiip’insgum gat, Amgathl wat. K’il̓hl sa ii sag̱ootkws Amgat dimt baḵdiit dimt gigil̓diit wil joḵhl Sim’oogidim Lax̱hahl adigwil adaawaḵdihl t’ist’isit. Nax̱n̓adiit wil lukw’il amaa m̓ashl hlguuhlgum hanaḵ’t ii hasaḵdiit dimt tḵ’al-w̓atdiit.

Sag̱ootkws Amgat dimt baḵdiit dimt g̱o’otdiithl anjoḵ tgus jidaat luu-hloohla’atkwdiithl ts’uuts’. Gidii-doḵdiit t’ipx̱aathl amaa g̱alimḵsim ts’uuts’. Wilk’iit ts’o’otdiit iit gwilgwalkwdiit n̓ihl dim luu-hloohla’atkwdiit. Nidii n̓akwhl wilhl k’uba ii’uxwt iit da’aḵhlkwdiit liibaykwdiit ahl g̱agwiis ts’uuts’diit.

Hlaa gwildim g̱ootdiit dimt g̱o’odiit wil t’aahl w̓ii sim’oogidim ts’im-lax̱ha. Wil k’iit mahldiit ahl angigatkwdiit dim wilt g̱o’odiit wil n̓akw. N̓iwilt gwin̓adiit anooḵ’askw ahl g̱a’angatkwdiit. N̓iwilt tx̱aa doḵdiithl gilp’ilhl naatx̱, mitkw ahl windo’o.

Wilk’ii sit’aama’am liibaykwdiit, lip ndahl w̓adiit, liksg̱alts’ipts’aphl n̓ii-yox̱kwdiit. N̓iwil g̱aks hagwin-lakdiit awa’ahl mismaa. W̓ii sg̱an̓ist an sg̱al-lihlk wil t’aahl w̓ii Sim’oogidim Lax̱ha. N̓iwil k’ax̱ joḵdiit, iit laḵ’aldiit wilaa ninda hisyats’a’ahl sg̱an̓isim lakw. N̓iwilt ga’adiit wil ts’uu tx̱alpx̱ ḵ’aḵt k’ii n̓iwil ts’uusgim n̓akwhl ḵ’an hitkwt. Dim gan ax̱ tḵ’al-ninda hisyats’a’anhl sg̱an̓ist n̓idiit.

Ts’uu tx̱alpx̱hl sa, n̓iwilt baḵdiithl dim g̱alksi-liibaykwdiit, sim gwildim g̱oot n̓idiit. Sim n̓iwil ts’uu tx̱alpx̱hl ḵ’aḵt wil k’ii sim luu-g̱atg̱oot’inskwdiithl g̱alksi- liibaykwdiit. Sim hug̱ax̱ wilaa g̱alksi-lak diit g̱ooḵhl dim huxw sg̱a-daaw̓ihlt.

 

WIL TḴ̱’AL-W̓ATDIITHL HAANAḴ̱’
Sim n̓iwil g̱alksi-lakhl hlguuhlkw luulaḵ’ g̱ans Amgat, iit ga’adiit wil hitkwhl wilp, iit wilaaxdiit wil n̓ihl wilphl sim’oogit. Wilk’ii wadin-liibaykwdiit loot, iit w̓adiit wil liiliixwdiit awa’ahl wilp, dilp’int wil t’aahl gwanks. Lihlkdiithl dim aat’ikshl dim aksgwit. Dimt wilaa gidax̱diit ndahl dim wilaa lamjaxdiit ahl wilphl sim’oogit. Hlaa nigitnaa ji w̓itgwit wilk’ii sag̱ootkwdiit dim laalaḵsdiit. Mit’indiithl g̱a ts’maaḵdiit ahl aks. Ḵ̱’oom̓ax̱kwdiithl dim bakwhl bag̱adilhl hlgim haanaḵ’hl sim’oogit, dim akskwdiit. Tx̱alpx̱hl huxw min-g̱alaalaḵsdiit dim wilaa sixsakskwdiit g̱ooḵhl dim tḵ’al-w̓e’eskwdiit. Wilk’iit hak’sim luu-hloohla’atkwdiithl gwiis ts’uuts’ ii liiliixwdiit.

Luu-wilhl k’uba haanaḵ’ ts’im-wilp, ii n̓aam akskwdiit, wilk’iit gidax̱diit nigwoot diit dimt g̱o’odiit aks awa’ahl gwanks. Gwinaadiihl t’ipx̱aathl amaa g̱alimḵsim ts’uuts’ awa’ahl gwanks. Wilk’ii sag̱ootkwhl silgidit dimt gidii-doḵdiit, dim iit luu-dihilyaltkwdiit, dim hlgim ts’uuts’diit loot. Wilk’ii wildiit, iit dibakw diit ahl ts’im-wilphl sim’oogit. Iit doḵdiit awa’ahl wil laahldiit wil woowaḵhl haanaḵ’. Wilk’iit saa-dog̱ahl k’uba ii’uxwthl g̱agwiis ts’uuts’diit ii hak’sim huxw k’uba ii’uxwtdiit.

Hlaat wilaaxhl sim’oogit wilaa jipjabihl bag̱adilthl ii’uxwt an n̓ii-w̓adiit, iit luusaa naahlkwhl g̱anda’aḵhla’amskwdiit wil g̱alksi-lakdiit wil ninda hisyats’a’ahl sg̱an̓ist. Wilk’iit niinikskwdiithl hlgim haanaḵ’t. Ii n̓iwilt anooḵhl sim’oogit dimt siljoḵdiit ahl g̱alts’ap. N̓iwil ubinhl hlgim haanaḵ’t ii hlgim ii’uxwdiit. Hlaa lisgithl k’uba ii’uxwt, ii t’igwingwantkwdiit lax̱- han̓iijoḵ, bakw ahl ts’im-lax̱ha. Awa’ahl g̱alts’aps nigwoots Anm̓oog̱am Haat wil dii ukshl hlguuhlgum gatt, ii lax̱ mooḵ, aaḵhl ḵ’alii ksan wil dii ukshl hlguuhlgum gats Amgat.

HLAA SGATS W̓IIGAT
Lip nits’iits’ hlguuhlgum gats Anm̓oog̱am Haat an w̓at, haw̓indii n̓akwhl g̱alaanhl hlidaa n̓uw̓hl k’yoohl huxwdaak’int. Ii gigiinax̱kwt dim hak’sim didilst. N̓iwilt guutdiit hlgu gat dim hlguuhlgum gatdiit loot. Ii m̓ashl hlgu gat tgus ahl dim w̓ii dax̱gadim gatt. Ii nidii gwiix xwdaxt. W̓ii Gat wilaa wilaaxhl gat n̓it. Sidilpkwdiit ahl W̓ii gwiix Xwdayim gat. Gwiix xwdax n̓it hliskwt haldaaxws leex̱-w̓oosa’a.

K’il̓hl sa iit naxn̓as Leex̱-w̓oosa’a, jakw’iskw an da’aḵhlkwt leex̱-giphl hli g̱ookt g̱anhl hli ang̱alaanhl hligatt. N̓iwil hasaḵs Leex̱-w̓oosa’a dimt tḵ’al-w̓adihl hlgu gat, wilk’iit luu-hlo’otkwhl hlaa w’iitisim gat ii w̓itkw awa’ahl wilphl sim’oogit. Hlaat tḵ’al-w̓adihl hlgu gat, wil k’ii hasaḵt dimt laaḵ’alt, wilk’iit luu-hlo’odihl g̱aakt ts’imaaḵhl hlgu gat. N̓ihl k’ii n̓ii-t’aahl agu ahl g̱aaḵt, iit hloḵ’ḵwhl hlgu gat. Hlaa g̱alaans leex̱-w̓oosa’a wil k’ii sit’aama’ahl gwiix xwdaxhl hlgu gat.

Sgwatgwiihl sit’aama’am xwdax hlgu gat iit sayt giphl sa’andoosgum wineex ts’im- wilphl sim’oogit. N̓iwil wilhl sim’oogit gwin̓am wineext ahl hli gadihl g̱alts’ap. Sgwatgwiihl huxw dii dukwsgum wineex hli gadihl g̱alts’ap. N̓iwil hihl sim’oogit dimt kwsdaḵsdiithl g̱alts’ap, dim iit ginaa- t’aatdiit W̓ii Xwdayim Gat.

Nidiit wilaax hlgu gat agug̱ant kwsdaḵsihl gathl g̱alts’ap, ii ginaa-k’yools n̓it, iit giphl k’uba wineex ginaa-dox̱diit loot. Hlaa huxw sa ii daaw̓ihlt ahl ḵ’alii-aksim Lisims dimt gigil̓hl wineexhl dim gibit. N̓iwilt ga’ahl wil kw’ihl laḵhl amaa m̓asim hoon ii hit ahl hoon tgus: “Lukw’il amaa m̓asim hoon n̓iin, aamhl hagwin-lag̱an awa’ay̓ dim hlibal̓diy̓ n̓iin.” Sim n̓iwil dimt das W̓iigathl hoon wilk’ii ukws-laḵt, ii wildiit w̓ii sa, hlaa sim yukwhl wildiit tgus, W̓iigat g̱anhl hoon ii huxw k’eex̱kwt. N̓iwil hihl hoon as W̓iigat: “Naa t an ax̱ wilaayinis W̓ii Xwdayim gat.” Hli g̱alaanhl sa tgus n̓iwilt wilaaxdiit huxwdak’inhl sim’oogit ts’im-lax̱ha as W̓iigat. N̓iwil hlintxs W̓iigat ahl hoon iit x̱hootkwt: “Dim k’aa w’iit’ishl t’img̱esin ahl hli gadin dim ii w̓ii lay̓hl ts’imaag̱an, ii nidiit naa dimt an gibin.” N̓iwilt hugax̱hl hoon tgus wilaa jabihl m̓isḵ’ayaay̓t. N̓iwilt wilaaxhl gat n̓it ahl gwiix xwdax. Adigwil n̓aam yuux̱kw ii adigwil kw’ihl yeet gigil̓hl dim wilaa yuux̱kwt.

LUU-YALTKWT W̓IIGAT AHL LAX̱HA
Hlaa hugax̱hl g̱abiihl k’uuhl luubayt kw’ihl wils W̓iigat ahl ḵ’alii-Lisims iit amg̱oohl g̱alts’ap wil w̓itkw. Wilk’ii luu-yaltkwt, gwinaadiihl nidiit naa ji jog̱at loot, hlaa kw’ootkwt. N̓iwil sag̱ootkwthl dim luu-yaltkw awa’ahl sim’oogit ts’im- lax̱ha. Nidiit sim wilaaxhl gat nda wilaa luu-yaltkwt, ḵ’am k’il̓hl wilaaxdiit wilt luu-hlo’otkwhl anaasa g̱aaḵ ii g̱alksi- gibaykwt wil ninda-hisyats’a’ahl sg̱an̓isim mismaa.

Wilk’iit wayt g̱o’ohl awa’ahl wil joḵs niye’et, iit g̱o’ohl wil t’aahl gwanks wil k’ii sisatkwt, sayt tx̱alpx̱ yukwhl laḵst loot. Iit ḵ’oom̓ax̱kwhl dim huxw bakws dip nox̱t g̱ans nixdaat dim akskwdiit. N̓iwilt luu-hlo’otkwhl laḵsa sginist ii kw’ihl gigyookst.

N̓iwil bakwhl dip nox̱t g̱ans nixdaat, iit ts’im-an’undis nox̱thl dim aks, ii lag̱am- t’igwantkwhl hlgu laḵsa sginist loot. Bag̱at dimt wadin-swant yukwhl wilt iit tḵ’al-aksit. N̓iwilt tḵ’al-hloḵ’kwhl hlgu laḵsa sginist, wilk’ii luu-t’aat ts’im-bans nox̱t.
N̓iwil aluut’aa wil ubins nox̱t. Aamhl g̱an̓agwit wilk’ii sgathl hlguuhlgum gatt, iit k’aa siip’ins dip nox̱t g̱ans niye’em Sim’oogit Ts’im-lax̱ha. Ii k’aa t’il̓t m̓ashl hlgu gat ii w̓iit’ist ii dax̱gatt.

W̓II GAT G̱ANHL M̓AX̱
N̓iwil wilhl Sim’oogit ts’im-lax̱hat gin̓amhl tx̱aa n̓itkwshl aguhl hasaḵt. Hugax̱at wilaa wilhl g̱aniye’etkwhl k’ubatk’ihlkw. K’il̓hl sa, iit ga’ahl hlgu gat wil y̓aḵhl agu ahl haahlg̱an ahl wilps niye’et, hug̱ax̱athl hlit’. N̓ihl wat ahl m̓ax̱, luu-sgihl m̓isaax loot. N̓ihl aaw̓hl hlgu gat wilt wayt anooḵs niye’et dim ang̱alaaḵ’t loot. Luu-dabihl sahl ang̱alaaḵ’t loot. Yukwhl wilt ii woḵt, iit guus dip niye’ethl m̓ax̱ iit huxw y̓aḵdiit.

Sgwatgwiit anooḵdiithl dim ang̱alaaḵ’t ahl m̓ax̱ g̱agalg̱ahl wilp. Sim n̓iwil huxw woḵt iit ts’ilim-guutdiit n̓it g̱anhl hlit’ ts’im- wilp. Huxw sa ii ang̱alaaḵ’hl hlgu gat ahl m̓ax̱ iit wayt x̱hlip-ḵ’aphl g̱alts’apt dag̱o’odihl ang̱alaaḵ’t ahl m̓ax̱, yukwhl huxw wilt n̓iwilt guut iit dik’eex̱kwt.

N̓iwil luuyaltkwt lax̱-han̓iijoḵ, ii ḵ’alii- Lisims wil kw’ihl wilt. N̓iwilt n̓ii-w̓ahl wil yukwhl sisaakhl gat. N̓idiit an halaagax̱t hiig̱ooḵ hlaat ksg̱oog̱am gidax̱diit ahl wineex. Hlaat huxw gwin̓ahl dim x̱saakt ahl huwilit, iit hak’sim huxw halaagax̱diit n̓it. Nidiit n̓aam gindiit n̓it, hlaa ts’uu tx̱alpx̱hl yukwhl gwin̓e’eskwt, n̓iwil hit dimt m̓at’inthl m̓ax̱ loodiit, jidaat ax̱ gindiit n̓it. Wilaayis W̓iigat wil nidii ḵ’ap gigathl heheet, lluulaḵ’ n̓idiit.

Ganii n̓ihl heheet an halaagax̱t. N̓iwil hak’sim huxw sgats W̓iigat, n̓iwilt wilaax diit as Tx̱eemsim, iit m̓at’inhl m̓ax̱. N̓iwil ḵ’aḵhl g̱oyp’ax̱am m̓isaax, ii wil tx̱aa m̓isaaxhl han̓iijoḵ. N̓iwil kw’itkw’ootkwhl luulaḵ’ an halaagax̱t. Ksax̱ g̱al’inḵhl ginaa-bilx̱sim-llooksit lax̱-aks.

Ts’axwhl g̱abiihl wilaa wils Tx̱eemsim w̓itkwt mag̱oonhl Lisims wil wayt gisi- aḵhlkwt lax̱-mo’on.